نحو الكتاب الخامس للمدونين.. أنا دكر..!!!!

[caption id="attachment_496" align="aligncenter" width="272" caption="الدكر المثالي"][/caption]

نعم انا أجلت بتاع تلاتين تدوينة بين كرنفالية وحميمية وتهييسية ولقائناسية -نسبة إلى لقاء الناس وهو حدث نادر التكرر في حياة don مثلي يعيش في قصر الكورليونيس بعيدا عن البشرية.. لكي انشر هذه الدعوة..

قال لي أحمد مهنا انه انتهى من جمع الكتاب الرابع من مدونات مصرية للجيب.. وده جميل طبعا، صحيح مش فاكر ايه هو موضوع الكتاب لكنه شيء رائع طبعا..

وطبعا أيضا انا متابع مسيرة الكتاب الثالث كلنا انثى منذ بدايتها.. وعاجباني الفكرة...

ولكن بقه...!

أين المدونين..؟ الرجالة..؟ الشباب..؟ الشنبات..؟ فاكرين أصلا المصطلحات دي وللا نسيتوها.؟!

عارفين طبعا ان انا انثى ليست أول التحركات الإيجابية لبنات حواء.. فيه قبلها كلنا انثى واحترم نفسك وحاجات كتير..

طيب فين بقه بني حواء..؟

فاكرين حملة كلنا فوزي بتاعة أحمد سووو..؟ كانت أول -هه- نفس يطلع يفكر الناس -يا جماعة.. فاكرين يعني ايه رجالة..؟ اه احنا ما تبصوش كده- ان اللحظة التي ينتظرها سيد أبو حفيظة قد اتت وان فيه رجالة لتعود جملة "سيداتي سادتي" إلى الحياة..

لهذا سأعلنها من قلب المركز الدولي للتنمية الثقافية بالدقي اليوم عالية مدوية: أنا دكر..!!

أنا دكر هو مشروع الكتاب الخامس لمدوني مصر.. أنا دكر سيتحدث عن التبعات والكوارث والبلاوي والحاجات اللذيذة أيضا التي ترتبت على كوني دكر عايش في الخليقة.. ثم على كوني دكرًا عربيا.. ثم على كوني دكرا وضعوا فوق رأسه صورة الريس...

انا دكر سيتحدث عن علاقتنا بأنا أنثى.. وعن الحاجات اللي عاملاها فينا أنا انثى باستمتاع شديد غالبا.. وعن الحاجات اللي بنعملها احنا فيها ببراءة شديدة غالبا برضه..

انا دكر ح يريح التعبان.. ويفرح الزعلان..

أنا دكر ح يتباع الواحدة بقرش  يا بلاش..

اسمع اقتراحاتكم بقه