قال لك اللي ما يشوفش من الغربال يبقى أعمى..
ما هو صحيح يعني، ح يعملوا فيه إيه أكتر من انهم خرموه من كل حتة..؟
ويكاد يخيل للإنسان ان الغربال -أي المصفاة - قد صنع خصيصا تمكين الرؤية من خلفه.. حاجة زي الحاجز الرابع كده بحيث تشوف ولا تشارك أو تعبر..
لماذا أخبرك بهذا الكلام..؟
لأنه لما تبقى عارف جيدا ان فيه دعوة لإضراب شعبي يوم 6 إبريل، وبعدين تحصل هوجة البهائية في طنطا، وانت زي العبيط تلزقها في جمال عبد الرحيم وناسي خالص ان فيه 6 إبريل في نفس الأسبوع...
وبعدين تلاقي يوم 5 إبريل بالضبط خبر أو إشاعة عن جريمة اغتيال شاب مسلم في قلب مسجد على يد 3 مسيحيين وتلاقي ناس زي الهُبل بالضبط يصدقوا التحلف ده وينشروه قبل الإضراب بيوم واحد... إيه يا أخي..؟ مش مرتاب ولو بنسبة 0.0000000003 %...؟؟!!
يبقى ده اسمه إيه..؟ ليس له اسم في رأيي إلا إنك لا ترى شيئا من الغربال الذي تعتبره في هذه الحالة تلفزيون ملون تجلس امامه منتظرا ظهور صورة لن تظهر أبدا لأن مخترع الغربال ما عملش حسابه انك ح تستعمله كتلفزيون...!
أعرف تماما أن معتنق نظرية المؤامرة مريض نفسيا.. لكن الكافر بنفس النظرية هو ساذج إلى حد الإعاقة الذهنية..!
على جنب: كنت قد وعدتكم على الفيس بوك والجايكو ان البوست القادم سيكون عن التطبيع.. لكن "الوارد" كان ضعيف في المسألة دي معلش.. أما إذا كنتم تبحثون عن بوست متصل برأيي في 6 إبريل نفسه، فقد قررت تأجيل كلامي إلى ما بعد 6 إبريل.. لإني أرى من الغربال ما يكفيني لمعرفة أبعاد الصورة..!
هناك تعليق واحد:
أوكيه يا دون
إرسال تعليق