بقول لك

ما تيجي تمسك إيدي وتكتب بيها
مين عارف..؟
مش يمكن اللي ح تكتبه إيدي بعقلك يكون أحسن من اللي كتبته إيدي لعقلك..؟
مش ممكن إيدي عجّزت بعد 28 سنة قضت معظمهم كتابة..؟
مش ممكن تكون على الأقل انت بتفكر..؟
تعال كده اكتب بدالي
اكتبني
اكتب تاريخ مستقبلي على رأي عبد الرحمن يوسف

مش عارف أخلي ده بوح، ولا اعتراف، وللا تاج
أقولك احسن، خليه تاج
اكتب قصة حياتي خلال عشرة، عشرين، تلاتين، أربعين سنة من دلوقت
ده على اعتبار يعني اني ح اعيش كل ده
أي خدمات..؟
...
...
...
أه صحيح، انت ما تعرفش قصة حياتي في ال28 سنة اللي فاتت
ابتكر يا أخي، ابتكر..

***
على جنب: أنا كاتب قصة، ناصري قومي، متصوف، عندي فوبيا ارتفاعات، ما بعرفش اسوق عجل، مهووس بالتصحيح اللغوي والكمبيوتر، بقية التفاصيل منتوَرَة في أرجاء المدونة
عيش بقه

***
على جنب 2: البوست القادم ح اتكلم فيه عن ديانة جديدة اسمها عبادة مصر، وعن مصطلح جديد نحتته بنفسي اسمه "الفرعونازية" PheroNazism  وهو على أكثر التقديرات تفاؤلا، التيار الحاكم كمان شوية أو النظام الذي يتهيأ لحكم مصر، إعمل نفسك ما شفتش الملحوظة دي وركز في موضوع البوست لو سمحت..

***
على جنب 3: آه، تلاقيك بتسأل إيه التلج اللي نازل ده
ده تعبير ممعن في السخرية عن أزمة الهوية المقيتة اللي عندنا دلوقت، التي جعلتنا نرفض عروبتنا ونعلق أشجار الكريسماس وقلوب الفالنتين ونتخيل ان فيه تلج نازل...