مش عارف حاسس ان حد دعا على منتخب مصر في ليلة مفترجة قائلا: روح يا شيخ لا تكسب ولا تخسر
أو تبقى ماشي في الشارع وداخل على واحد يفتكرك سايبه وماشي
أو أي حاجة هبلة كده
بصوا أنا مش متعود أكتب في في الكورة.. مش متعود ايه انا ما بكتبش أساسا
لكن من ساعة ما غلبنا إيطاليا وانا حاطط إيدي على قلبي.. متذكرا مرة أخرى غلبنا فيها إيطاليا برضه.. يوميها كان الشعب العربي في مصر بأكمله ماشي يكلم القطط في الشارع من الذهول والقطط كانت بتكلم الناس في الشارع من عدم التصديق..
وبعدين خلاص بقه بعد ماتش البرازيل دخلنا في الهبل المطلق
إيه بقه..؟ مرة أمريكا ومرة كوستاريكا..؟
يكونش ده عشان خصخصنا بسكومصر اللي كانت بتعمل "إيكا" تاني أفضل شيكولاتة مصرية بعد كورونا..؟ يعني مثلا من ساعة ما بعنا إيكا بقينا ملطشة لكل إيكا..؟
إييييييييه.. بقه..؟ إيه الهسس ده على رأي نوارة..؟ هما ح يجننونا ليه..؟ هما لعيبة وللا لأ..؟ حريفة وللا لأ..؟ فاهمين هما إيه وللا زينا مش فاهمين أي حاجة..؟ هوّ مش المفروض ان جيل التمانينات خلاص واللعيبة اللي موجودين دلوقتي من مواليد التسعينات أغلبهم.؟ وللا جيل التسعينات مضروب زينا هو راخر..؟
بالمناسبة.. انا مش بس ما بكتبش عن الكورة، انا ما بشوفش ماتشات من أصله
بس شفت وشوش العيال وهما راجعين من الاستاد راسمين العلم على خدودهم ومدلدلين من الإحباط..
حسيت ان لو واحد فيهم اشترى قزازة بيبس برضه بتاع الكشك ح يقول له شوف لي عشرة غير دي.. زي الإعلان المقززززز المستفزززز اللي كانت كوكاكولا بتشحت بيه على لاعيبة المنتخب..
عشان تعرفوهم.. روحوا شجعوهم...!
إذا كان لا هما عارفين نفسهم ولا احنا عارفين نفسنا..!!
ليست هناك تعليقات:
إرسال تعليق