إنتوا فاكرينها صحافة بجد..؟!

[caption id="attachment_469" align="aligncenter" width="171" caption="ليست صحافة"][/caption]

عندي سؤال لو يسمح الأخ الصحفي أو لا يسمح فأنا سأسأله على كل حال: يعني إيه صحافة مدونات..؟

يعني صغحة أو تلت صفحة -ركن- عن المدونات والقضايا الساخنة المثارة عليها والحاجات التي تهم الناس أو على الأقل التي تراها أنت أنها كذلك..

جميل..

طب يا أخ يا صحفي.. هل هذه صحافة..؟

هي العملية ديّتها إيه..؟ أقول لك انا..

تفتح الكمبيوتر وتخلي السكرتيرة وللا حد من بتوع الجمع يعمل لك سيرش على الموضوع "كذا" ويعمل لك print out من اللينكات اللي فيها wordpress أو blogspot وبالمرة blogspirit عشان بالمرة نجيب معانا وائل عباس وقضيت على كده..! no mess- no fuzz  وصفحتك في ايدك وفلوسك في الإيد التانية ورئيس الصفحة يقول لك قشطة..

بس يعني اذا ما كانش فيها رزالة.. دي صحافة..؟

تدور على موقع بيدي دعاوي لجايكو وتشترك فيه وتضيف المدونين اللي هناك عن طريق وائل عباس برضه أو هاني جورج أو مالك أو حد من اللي ضايفين ناس كتير قوي دول.. وتك تك تك التدوينة تكون عندك لحظة ما تنزل وأول ما تتكلف بالموضوع "كذا" تقوم جري فاتح الجايكو وللا الجووجل ريدر وتشوف الناس كاتبة ايه.. ميزة المدون انه غالبا بيكتب عن الحدث في ساعتها ودي حاجة أكيد ح تستكيف منها جدا يا أخ يا صحفي وح تفكرك بأيام ما كان الصحفي هو اللي بيعمل الكلام ده من نفسه وبعدين ح تنسى اللي افتكرته ده وبرضه صفحتك ح تبقى في إيدك وفلوسك في ايدك التانية ومدير التحرير يقول لك قشطتين...

بس يعني اذا ما كانش ح يضايق حضرتك.. دي صحافة..؟!

وطبعا لأن سيادتك صحفي قد الدنيا ومعاك شهادة عالية -مش بكالوريوس بصمجية بتقدير مدفع سريع البصمات- فلازم وانت بتعمل الكوبي وبست يبقى ليك نظرة مبعدية في الكوبي وبيست، يعني لما كالعادة تتكلف بموضوع "كذا" وتلاقي المدون مش مراعي المعايير الصحفية وهو بيكتب التدوينة -أصله يا حرام مكانش عامل حسابه ان سيادتك ح تسرقها- فمفيش أي مشاكل.. طلع المقص وادعي لبيل جيتس اللي زي ما عمل لنا Copy و Paste عمل لنا Cut كمان (*).. ومشيها لا تقربوا الصلاة طالما كونهم سكارى أو لأ مش موضوعك، وللا مثنى وثلاث ورباع ومش مشكلة برضه يعدلوا أم لا يعدلوا براحتهم، ولتكن الاشتراكية ان الناس تشتغل عند الحكومة والحكومة هي اللي تلم المكسب وطبق لحد هنا بس... اما بقه اذا كنت بتشتغل بروحين يعني صحفي وناشط سياسي فلا مانع أبدا أنك تجيب المدونات التي ينتمي اصحابها لأيديولوجيات مختلفة وامسح بيهم الأرض على كيفك واتريق عليهم وعلى افكارهم لما تشبع..! (**) وبرررررررررررضه ح تبقى صفحتك في.... إيدك وفلوسك في إيدك التانية ورئيس التحرير بيقول لك قشطات..!!

بس يعني اذا ما كانش فيها ازعاج لسيادتك.. دي صحافة..؟!

هو انا ما اعرفش إيه موقفك.. لكن أنا مدون يرفض صحافة المدونات.. وصحفي يرفض صحافة المدونات..

ليه..؟ أنا كمدون بكتب للناس وما بطلبش منهم فلوس.. وانت كصحفي بتاخد كتابتي دي وبتقبض عليها فلوس انت ما تعبتش فيها.

أنا كصحفي أرى صحافة المدونات إهانة لإبداعي ولقدراتي الصحفية.. لأني بدل ما انزل اجيب خبر أو اعمل حوار مع مصدر أو اكتب فيتشر أو كتوبة... إلخ بعتمد على مجهود غيري.. باتطفل من الآخر وما بتعلمش حاجة.

الصحفي بياخد تدوينتي من غير ما يستأذن، واذا استأذن بيقول لي انا ح انزل التدوينة دي في جريدة كذا عدد يوم كذا -مش استئذان قد ما هو اعلام بأمر واقع- واذا أعلمني واستأذني فهو غالبا يعمل مقص التعديل والحذف والانتقاء في التدوينة بشكل قد يفرغها من مضمونها.. وإذا لم يفرغها فسيكتفي غالبا باسم مدونتي دون ذكر اسمي انا أو رابط المدونة مما يعرض الباحث للالتباس بين مدونات وربما منتديات تحمل نفس الاسم فهو يهدر حقي في نسبة انتاجي إلي..! واذا تجنب كل هذا فهو لا يزال بيقبض فلوس على شغل انا عامله عشان يكون مجاني..!!

لهذا انا الصحفي وأنا المدون نتفق على رفض صحافة المدونات.. وسأرفض كصحفي أن أشارك في هذه المهزلة وسأقاطع كمدون كل الصحف التي تتاجر بمدونتي إلى أن ترد لي حقي وتتوقف عن هذه الممارسات.

وسأضع هذا الشعار تعبيرا عن موقفي.



__________________________

* نفذت جريدة الشروق الماشية ع الموضة تلك الفكرة بالفعل في العديد من التدوينات التي سـرقـتـها فأعمل الأخ الصحفي الأزميل والمنشار والفارة في التدوينات دون اهتمام ومنها تدوينة بنت القمر عن آسر ياسر مما تسبب في تصاعد ثورة المدونين التي نجمت عنها هذه الحملة وشقيقاتها..

** أما جريدة البديل فقد نفذت الفكرة عن طريق احد محرريها من ذوي الاحتياجات الماركسية الذي دأب على مهاجمة المدونات القومية بشكل خاص منها هذه التدوينة للصديق شادي العروبة (سيوصلك اللينك للكلام المنشور مباشرة.. على الله الناس اللي كانت بتسألني بتكره البديل ليه تكون فهمت دلوقت..!!)