واحد
تاني
مسافر
برضه
واخد حلمين
على قد الشنطة ما ساعت
وبقية أحلامه
سايبها
ف درج دولابه
ف بلكونة السطح
عند البقال اللي قصاده
عند جيرانه
ف حضن حبيبته..!
***
واحد
تاني
فـُـلـّـة كمان
عقد الفل اللي بيتفرفط قبل ما ينشف
فكرني بيوم لضمتنا وانا ف الجامعة
فكرني برباعية لعم جاهين متقالة غلط..
جيت اصلحها
باظت أكتر..!
جيت اقول غيرها
نسيتها
قلت اقول شعر من اللي انا كاتبه
وطلع بايظ برضه..!!
***
واحد
أول
قبل التاني
سافر
رايح نفس السما
طاير
سايب نفس الأرض
قلت له
قلت لهم:
طب ينفع حد يعيش طاير...؟!
وما حدش رد..!!
***
فكر تاني
مش كل احلامي ف بلكونتي
عند البقال اللي... إلخ إلخ..!!
فيه احلام تانية
مع اصحابي
على قهوة سهرت عليها جنب النيل
على عربيات الأمن اللي منتورة ف الشارع
وعلى.. ومع.. و.. و.. و..يا نهار أبيض..!!
ح الحق الم ف كام اسبوع اللي انا نتورته ف عمر..!!!!؟
***
مين فيهم فكر قبله..؟؟
أول
تاني
تالت
واحد سافر فعلا
واحد ح يسافر
واحد بيشاور عقله
مش فارقة
لكن فكر
انا مش حاخد شنطة
ولا أحلام
شيلها امانة ف درج دولابك
وف بلكونتك
مع احلامك
لكن اوعى تسافر
تتفرفط
قبل ما تنشف
زيي
وزيه
وزي بقية الناس الجاية ورانا
وتسيب عقد الفل...!!!
أحمد فيصل
5 يوليو 2008
5 يوليو 2008
ليست هناك تعليقات:
إرسال تعليق